[rigالبحر سافر للمدَىَ
البحر سافِر للمدَىَ
شايل معاه أسرار كتير
شايل معاه كل الهمُوم
كانت بتحصل كل يوم
معرفش من إمتى ابتدا
لكنه طول اليوم يعوم
الموجه فيه مِتـْشـَتـِّتـَه
حبه ف سكون
وكتير تهيج
فرحِتها ما رضيِّت تدوم
أو تِنتِهي بشعور بهيج
مش عارفه تِحْزن
واللا تِفرح
واللا تِعمِلهُم مزيج
ع السطح ريح بيجُرَّها
مش قادره تِوْصَل برها
والمخلوقات جوَّه الغريق
عايشه وكاتمه ف سِرَّها
فيها السمك زي الجراد
عايز يعيش زى العِباد
لكِن بيطـْلـَعْلـُه الكبير
يقـْفِل عليه كل البيبان
يقطع عليه كل الطـُرُق
يستعبـِدُه
ويقـيِّدُه
ولحد مايكون اتخنق
والمُعْتـَرِض أو مُنتـَقِد
يخـْبَط دماغـُه وينفـَلـَق
والموجه بتعافِر .. تِقاوِّم قهرها
لكِنها محصوره بين شـُطآن كتير مِتلـَغـَّمَه
ممنوع عليها تقول حرام
لو حتى كان بالهمهمه
توْصَل هناك
تِلقـَىَ الجبال بتحِدَّها
وان جت تفوُت من فتحه بانِت في الجبل
تلقى الرمال بتسِدَّها
الموجه فوق رح تِنتِحر
أما اللي تحت بينخنـَق
لا هوّ قادر ينـْسَرَق
يطلع لفوق يهرب بعيد
ولا هوَّ قادر ينخلـَق
ويعيش حياته من جديد
ميكونش بين شق انفلق
وعليه سياخ صلب وحديد
لكنه لازم قبل ما يشـُّق الطريق
لازم يفوق
ويقيِّد الوحش الكبير
يرجع يدوق حريِّتـُه
ويدوق حلاوة كلمِتـُه
يحبس حيتان كان هدِّته
يسجنها في عمق المحيط
ينسى مرارة شكوته
يطلع لفوق علشان يبان
يفتح بيبان
ويكون حوِّيط
ميسِبش نفسُه للزمان
لازم يحدد سِكـِّتـُه
يفرد قلوعه ويبتِدِي
يعرَف يكون دوْلِتـُه
والبحر تِهـْدَى ثورته
والموج يبيِّن رقِتـُه
والدار تعود دار الأمان
السبت فبراير 20, 2010 1:14 pm من طرف eng eslam
